Gryndigsgschicht vom 10-ab-Vieri Clübbli

 Am Mäntig vom 6. Merze im Joor 2006 am zwai de Morge, hänn sich wie alli Joor e baar verainzelti, faasnachtssychtigi Grachsymphoniker fir e Morgestraich in der Harmonie uff dr Lyss iigfunde. Mr hänn wie allewyl welle die wenige Schdunde und Minute vor em Morgestraich – die jungfreyligi Faasnacht – unter beschte Frynde gniesse, d’Stimmig iinesuuge – und gmainsam die scheenschde drei Dääg mit emene stille, wiirdevolle Schissdräggziigli aafoo.

Doch was haisst „in der Harmonie iigfunde“? …. Glygg hämmer khaa, dass mr uns iberhaubbt hänn kenne neyme iifinde!   –   offesichtlig bruchts mittlerwyle e Verain und e reservierte Disch, damit me derf an der Faasnacht mitmache  –   die ganzi Baiz isch braggtisch vorreserviert gsi vo x-beliebige Clique. Fir uns hätt das bedidded, dass mir am zwai zwoor scho iberall hätte kenne aanesitze - aber am halber vieri hätte miesse uffschdoo - um de…„am viertel vor vieri e Kaffi dringge - am 5 vor vieri iischtoo Profi-Fasnächtler“…Blatz z’mache!

….isch das Morgestraich? …isch das Faasnacht? ….hänn mir is gfroggt und gmainsam gschbiirt      -   es ka doch esoo nit sii!

Morgestraich isch doch mee als numme anne reservierte Disch z’hogge und am finf vor vieri uff d’Strooss z’rusche -  numme zem am viertel ab vieri wider anne näggschde reservierte Disch innere andere Baiz aane z’sitze.

Wenn’s aber also offesichtlig e Verain und e Reservation bruucht um am Morgestraich derfe derby z’si denn sells eso si……und doodermitt isch d’Idee geboore gsi en aigene Verein z’grinde   -    und well mir finde, dass Faasnacht und vor allem Morgestraich mee isch als numme am 5 vor vieri iizschdoo, hänn mir beschlosse dass MIR uns erschd am 10-ab-vieri mit unserem Schissdräggziigli uff e Wäg durch die dunggle, wunderscheene Gässli mache.

Mir hänn aagfange uns e Verainsname uszdängge und derby no aine oder au zewai gnoo und hänns luschtig kha. Es isch is denn au glii e passende Name iigfalle und mir hänn bschlosse uns ab jetzte „s’10-ab-Vieri Clübbli“ z’nenne. D' Schdatute hänn mr uff zwai Bierdeggel gschriibe wo an allne 8 Egge in jedem Gryndigsmitgliid sym Gedrängg dauft worde sinn. 

Mitderby und Gryndigsmitgliider sinn dr Oliver F., Marco R., Lukas B., Gil K., und der René J.  D’Judy isch s’Chicken gsi und dr Peter unser erschds Passiv-Mitgliid.

Pinggtligg am vieri isch s’Liecht uusgange und mir hänn mit fiechte Auge mitenand uff unser 10-ab-Vieri Clübbli, e wunderscheene Morgestraich und e unvergässligi Faasnacht aagschdosse…

 ebbe… 

„…unter beschde Frynde und well Morgestraich mehr isch als numme e reservierte Disch und am Vieri iischdoh!“

„Was isch fyr Zyt...........?“

„Zää ab........ Vieri!“

E Grindigsmitgliid imJoor 2006